The Battle Of Falkirk Muir

Up and run awa', Hawley, up and run awa'
 The philabegs are comin' doon tae gie yer lugs a claw
 Young Charlie's face at Dunipace has gie'd yer moo' a thraw
 Hawley, blastin' sight o' bastard wight the worst that e'er he saw
 Hielan' Geordie's at yer tail wi' Drummond, Perth an' a'
 Up and run awa', and run awa'
 Whene'er ye saw the bonnets blue doon fae the Torwood draw
 A wisp in need did you bestead perhaps you needed twa
 General Husk that battle busk that pride o' warriors a'
 Hawley, whip and spur he crossed the furr as fast as he could ca'
 Hielan' Geordie's at yer tail wi' Drummond, Perth an' a'
 Up and run awa', and run awa'
 I hae but just ae word to say and ye maun hear it a'
 We came to charge wi' sword and targe and nae tae hunt ava'
 When we came doon aboot the toon and saw nae faes at a'
 We could not believe the truth that ye had left us a'
 Hielan' Geordie's at yer tail wi' Drummond, Perth an' a'
 Up and run awa', and run awa'
 Nae man bedeen believed his een till your brave back he saw
 Hawley, bastard brat o' foreign cat had neither pluck nor paw
 We didnae ken but ye were men wha fight for foreign law
 Gae fill yer wame wi' brose at hame, it fits ye best of a'
 Hielan' Geordie's at yer tail wi' Drummond, Perth an' a'
 Up and run awa'
 The very froon o' hielan' loon it gart you drop the jaw
 Happ'd the face o' a' disgrace and sickened Southron maw
 The very gleam o' hielan' flame it pit you in a thaw
 Gae back and kiss your daddy's miss, ye're nane but cowards a'
 Hielan' Geordie's at yer tail wi' Drummond, Perth an' a'
 Up an' scour awa', Hawley, up an' scour awa'
 The hielan' dirk is at yer doup an' that's the hielan' law
 Hielan' Geordie's at yer tail wi' Drummond, Perth an' a'
 Had ye but stayed wi' lady's maid an hour or maybe twa
 Yer bacon bouk an' bastard snout ye might hae saved them a'