Bàla laica

Mi ve conto 'na storia che no me credì
 Ma l'è vera ve giuro che l'ho vista mi
 L'è la storia de un prete de stansa a Poiàn
 Che el vin santo el gh'avea ciapàdo un po' la man
 Se ciamàva Don Mario, par tuti dal bon
 L'era don Balasànta, el prete 'mbriagòn!
 La domenega a messa al Kyrie eleisòn
 Un giossetto de bianco a le sconte 'ndava zo
 "Maria Vergine se te vol farme un piasér
 Te domandi a to fiol de riempirme el bicér
 G'ho do litri de acqua là nel lavandìn
 Che i tramuta in Soave, Custòsa e Bardolìn!"
 Ma po' nel Quarantuno i decise così
 De mandarlo a seguìr i soldadi sul Don
 Capelàn militar drento nel'ospedàl
 Quanti morti e disgrassie, sul fronte orientàl!
 Là nel fredo e nel vento de Dnepropetrovsk
 Ne la gran ritirada i moriva ingiassà
 E un giossetto de vodka de Mario 'mbriagon
 L'era gran più richiesto de la benedissiòn
 Ma un matìn drento l'isba el s'ha indormensà
 E da du bolsievichi l'è stà caturà
 A Quei coi preti, se sa, che no i va tanto a pian
 I fusìla sul posto sensa gnanca dire
 "Da"
 Ma don Mario la vodka ghe verze a quei du
 Che i la beve de gusto e i la versa anca a lu
 Così in tri drento l'isba i scominsia a cantàr
 Ma stavolta de Stalin, de Lenin e de Marx!
 L'è con la bala laica che'l s'era salvà
 E da alora par quela così i l'ha ciamà
 Balalaika de Russia, che musica fa?
 Sòna ben 'sta cansòn, la Contrada canterà!
 L'è con la bala laica che'l s'era salvà
 E da alora par quela così i l'ha ciamà
 Balalaika de Russia, che musica fa?
 Sòna ben 'sta cansòn, la Contrada canterà!