Kapag Nakita Mo na Siya

Kapag nakita mo na siya,
 Huwag kang magtaka
 kung hindi ka agad niya makilala
 Kung ano 'yong naramdaman mong kilig,
 baka iyon naman ang naramdaman niyang inis
 Kung paano mo siya titigan,
 baka gano'n ka lang din niya lagpasan,
 balewalain at hindi pansinin
 Kung gaano kabilis 'yung tibok ng puso mo
 noong nakita mo siya,
 Baka gano'n din kabilis ang pag-alis niya
 At sigurado ako, itataboy ka niya palayo
 Kapag nangyari 'yon,
 Huwag mo sanang isiping wala nang pag-asa
 Siguro sanay na lang din talaga siyang mag-isa
 At sa hinaba-haba ng panahon ng pag-iisa niya,
 Iniisip niyang hindi na niya kailangan ng iba
 Ng isang katulad mo
 na maaaring magdala sa kanya
 sa ibang mundo
 Marahil, ganyan ang turo sa kanya
 ng buhay at pag-ibig
 Ang damhin ang lahat ng sakit
 Ang tanggapin kung anumang ibato ng buhay
 Ang palayain lahat ng emosyon
 hanggang sa wala na muli siyang maramdaman pa
 Kaya't kapag nakita mo na siya,
 Hindi na siya naniniwala
 sa paghiling sa mga bulalakaw
 Hindi na siya namamangha
 sa mahika ng buwan at mga bituin
 O ng kung anumang pwersa sa uniberso
 Na maaaring magtulak sa kanya patungo sa'yo
 Hindi na siya naniniwala
 sa anumang salitang nilikha ng pag-ibig
 Hindi na siya naniniwala sa pag-ibig
 Kapag nakita mo na siya,
 Baka ang tanging papel na lamang
 ng puso niya
 ay ang panatilihin siyang buhay
 Baka tumitibok na lamang ito
 upang padaluyin ang dugo sa katawan niya
 Dahil kapag nakita mo na siya,
 Nakalimutan na niya ang pakiramdam
 ng magmahal at ng mahalin,
 ng arugain at yakapin
 Pero huwag kang mag-alala
 Dahil mukha lang naman ng pag-ibig
 ang nakalimutan niya
 At ipaalala mo ito sa kanya
 Huwag kang magsasawang ipaalala sa kanya
 kung gaano siya kaganda
 Huwag kang mapapagod
 sabihin sa kanyang mahal mo siya
 Kahit na sa bawat pagbanggit mo
 ng mga salitang "Mahal kita"
 Ay pait at sakit ang naaalala niya,
 Huwag kang titigil na sabihin ito sa kanya
 hanggang sa maalala niya
 Na sa likod ng bawat pait ay may tamis
 Sa likod ng bawat sakit ay may ligayang dulot
 ang mga salitang "Mahal kita"
 At kung saktan ka man ng mga salita niya,
 Gantihan mo ito ng yakap
 Kung magpumiglas siya,
 hatakin mo siya pabalik at yakapin ulit
 Kung paulit-ulit siyang umalis
 Paulit-ulit mo rin siyang habulin
 Kung paulit-ulit siyang bumitaw,
 Paulit-ulit mo rin siyang hawakan
 Pakiusap, huwag na huwag mo siyang bibitawan
 Ipaalala mo sa kanya
 na minsan rin siyang humiling sa mga bulalakaw
 Na minsan rin siyang namangha
 sa mahika ng buwan at mga bituin
 Na minsan rin siyang naniwala
 sa mga salitang nilikha ng pag-ibig
 Na minsan rin siyang naniwala sa pag-ibig
 Pakiusap, huwag na huwag mo siyang pakakawalan
 Huwag na huwag mo siyang susukuan
 Hanggang sa maisip niya,
 na ang pag-iisa ay mayroon ding hangganan